FAX: 703 208 0589

ITANGAZO 003/2001 IKIGANIRO CY’ARENA I MONTREAL, CANADA

Banyarwanda, Banyarwandakazi, Nshuti z'u Rwanda, Imyaka irindwi irashize FPR ifashe ubutegetsi mu Rwanda, ariko nk'uko bigaragara, kandi nk'uko ARENA yabyerekanye mu nyandiko zayo, igihugu cyacu kiri mu gihirahiro. Abanyarwanda bari mu gihugu barashirira imbere; ubutegetsi bwa Perezida Kagame n'akazu ke ntibutuma binyagambura ngo bavuge icyo batekereza. Abantu bose bafite ibitekerezo binyuranye n'iby'agatsiko kari ku butegetsi, bamwe barishwe, abandi barafunzwe, abandi barahunze, abasigaye baracecekeshejwe.

Abanyarwanda b'ingeri zose bakomeje guhunga igihugu: abahoze mu buyobozi bukuru bw'igihugu nka Perezida w'inteko ishinga amategeko, ba minisitiri b'intebe, abaminisitiri, abadepite, abacamanza, abasirikari bakuru n'abato, abakozi bakuru ba Leta, abanyamakuru, abaharanira uburenganzira bw'ikiremwa muntu, abacuruzi, n'abaturage basanzwe. Aba bose ntabwo bahunga inzara nk'uko Perezida Kagame
abivuga, ahubwo bahunga iterabwoba, ubwicanyi n'ikinyoma byahawe intebe mu Rwanda.

Ubutegetsi bwa Perezida Kagame n'akazu ke bukomeje kuvunira ibiti mu matwi, bwirengagiza ibyo abanyarwanda n'abanyamahanga babunenga. Aho kwikosora, bukomeje gushyira imbere kurwana, gusebanya, gusahura umutungo w'abanyarwanda n'uw'abaturanyi muri Congo, gupfobya itsembabwoko kubera inyungu za politike, no gutoteza abanyarwanda ngo bakorana n'amashyaka y'abanyarwanda ari hanze. Inzego z'ubutegetsi (inteko ishinga amategeko, guverinoma, n'urukiko rw'ikirenga) zahindutse ibikoresho bya Perezida Kagame n'abo bafatanije kwonona igihugu. Mu by'ukuri inzego z'ubutegetsi zahindutse iz'umurimbo na poropagande aho kuzuzanya no gukosorana.

Amashyaka ya politiki n'amashyirahamwe anyuranye yagombaga gufasha abanyarwanda gutanga ibitekerezo byabo, ntakigira urwinyagamburiro; amenshi asigaye kw'izina kubera gukorerwamo na FPR cyangwa gushyirwaho iterabwoba. Ubutabera abanyarwanda bari bategereje bwaheze mu magambo. Kagame n'akazu ke bahisemo ubutabera budashingiye ku kuri, ubutabera bwa nyirarureshwa bugamije kwishakira imfashanyo mu mahanga no guharabika abatavuga rumwe nawe.

Muri iki gihe, ARENA ibabajwe cyane n'abanyarwanda bakomeje kurigiswa, abasilikari bicwa maze imiryango yabo ikabeshywa ko bakiri ku rugamba, abantu bafungirwa ahantu hatazwi, abantu bahozwaho iterabwoba kubera kudashyigikira imikorere mibi ya Leta, n'abantu bamwe bashoboye gucika Leta none ikaba ibaharabika ngo ni abicanyi cyangwa ibisambo.

ARENA ishyigikiye igikorwa cy'umuryango w'abibumbye cyo gukurikirana uruhare rwa buri gihugu mu busahuzi bukorerwa muri Congo. Ishyigikiye ko ukuri kujya ahagaragara kandi ibihano bikazagenerwa abo ubwo busahuzi buzafata, aho gufatirwa igihugu, kuko iyo bigenze bityo, abo ibihano bigiraho ingaruka ari abaturage b'inzirakarengane kandi nta ruhare na ruto babigizemo.

ARENA yamaganye ikomeje imigambi ya Perezida Kagame yo kugumisha ingabo z'u Rwanda muri Congo; nta kindi ashaka atari ugukomeza gusahura umutungo wa Congo, no kubeshya abanyarwanda ko abafitiye akamaro, abacungira umutekano. Inzira y'intambara ntabwo ari nziza kandi ntabwo u Rwanda ruzayishobora. Iyo ntambara izakomeza kutumaraho urubyiruko, gutwara umutungo wa Leta kandi abaturage bicwa
n'inzara, no guhindura abanyarwanda ba ruvumwa mu karere kubera gukunda intambara kwa Perezida Kagame. ARENA isanga inzira ihamye yo kubungabunga umutekano w'abanyarwanda ari ukwibanda ku mahame yo kworoherana, kwicisha bugufi no gukemura ibibazo hakoreshejwe inzira y'imishyikirano.

ARENA yamaganye ikomeje ipfobya ry'itsembabwoko rijyanye n'imikorere yo kugira umwicanyi umwere. Bikomeje kugaragara ko Perezida Kagame n'akazu ke bakomeje gukoresha génocide ku nyungu zabo bwite. Bakomeje gukingira ikibaba abagize uruhare muri génocide kubera ko bakeneye kubakoresha muri politike. Nyamara abere batemeye kuba ibikoresho byabo bahimbirwa amadosiye abasiga icyaha batakoze.

ARENA irasaba ikomeje Umuryango wa FPR na Guverinoma kudakomeza gushyira igihugu mu kaga bashimangira imitegekere mibi aho kugana inzira yo kwubahiriza uburenganzira bw'ikiremwamuntu no kworoherana.

ARENA irasaba ko Leta itakomeza kubeshya amahanga ngo u Rwanda ruri mu nzira ya demokarasi n'ubwiyunge. Amatora aherutse kuba, ndetse n'itegekoshinga ritegurwa ntabwo bizagira icyo bimarira abanyarwanda kuko bidashingiye ku kuri. Aho gushingira ku nyungu z'akazu biriya bikorwa byari bikwiye gushingira ku bushake no ku nyungu z'abaturage.

ARENA irasaba ikomeje imitwe yose ya politiki iri mu gihugu guhaguruka igaharanira uburenganzira bwayo bwo gutanga ibitekerezo bya politiki no kugira uruhare mu miyoborere y'igihugu. ARENA irasaba ayo mashyaka kwitandukanya n'imikorere igayitse y'ubutegetsi no kumenya ko uburenganzira budatangwa ko ahubwo buraharanirwa.

ARENA izakomeza guharanira ubumwe bw'abanyarwanda no kubaka igihugu kigendera ku mategeko.

Bikorewe i Montréal, ku italiki ya 12 Gicurasi 2001