AMAHORO-PEOPLE’S CONGRESS

CP 24024 CSP-POINTE
Montréal Québec H1A4Z2
Canada

isangano@spuce.he.net

ISHYAKA AMAHORO NTIRIZIYAMAMAZA KANDI NTIRIZAJYA MU MATORA ATEGANIJWE UYU MWAKA

Ishyaka AMAHORO riramenyesha abanyarwanda  bose, inshuti z'u Rwanda n'abandi bose bakurikirana politiki y'igihugu cyacu, ko nta muyoboke waryo uziyamamaza  mu matora yose ateganijwe uyu mwaka kandi ko ritazanatora.   

Icyateye ishyaka AMAHORO gufata iki cyemezo ni ukubera ko abayobozi baryo basanze  Perezida Kagame  adashaka ko abanyarwanda  bihitiramo abayobozi bishakiye bahereye ku migambi yabo, ubushobozi no kwitangira igihugu.  Mu by'ukuri amatora  yararangiye kubera ko Perezida Kagame,  abanyarwanda babishatse cyangwa batabishatse, ari we  uzatorwa  kuba Perezida kandi n'indi myanya yose abo ashyigikiye ni bo bazayitorwamo.Ibi byose biragaragazwa n'amananiza yashyizeho kugirango amashyaka adashobora kwiyandikisha mu gihe gihagije kandi nayo abone umwanya ukwiye  wo kwamamaza  abakandida bayo n'imigambi yayo, kuba yarashenye amashyaka amubangamiye  no kuba atari yarekura imfungwa za politiki. Ikindi ni ukubera ko ibitekerezo by'andi mashyaka yatanze nta na kimwe yigeze yitaho.

Itegeko-nshinga.

Mbere ko itegeko-nshinga ritorwa  mu kwezi kwa  gatanu k'uyu mwaka, Leta yasohoye icyo yise imbanzira-mushinga w'itegeko-nshinga kugirango abanyarwanda  bakuremo ibibangamiye cyangwa bongereho ibibuzemoIshyaka AMAHORO ryahereyeko rishyiraho akanama karyiga kakanatanga ibitekerezo by'ibikwiye kuvanwamo no wongeraho. Iyo nyandiko mushobora kuyisima ku rubuga rw'ishyaka: www.newrwanda.org.  Ni http://www.newrwanda.org/csec_report.htm. Perezida  w'ishyaka  nawe  yohereje itangazo ry'ibinengwa kuri iyo mbanziriza-mushinga.  Izo nyandiko ziri ku rubuga http://www.newrwanda.org/Imbanzirizamushinga.html.  Ishyaka AMAHORO ryanateguye ikiganiro-mpaka cyabereye i Montreal muri Canada cyatumiwe amashyaka yose, abanyarwanda bose ndetse n'abanyamahanga, ngo baze tuganire ku byo tubona kuri iyo mbanziriza-mushinga. Muri icyo kiganiro no  muri izo nyandiko zombi, twerekanaga ko itegeko- nshinga riha Perezida ububasha burenze kamere, ko atari byiza na gato. Twerekanye ko kubumbira amashyaka yose mu byo bise Forum ari  kimwe no kuyashyira mu bwato bumwe cyangwa ibyo abandi bise ikigare.  Twasanze urwego rw'abasenateri  atari ngombwa kubera ko akazi n'akamaro kabo kadasobanutse kandi  cyane cyane kubera ko bo batanatorwa. Tugaya n'amategeko aniga amashyaka atabonye amajwi menshi kandi ashobora gukomera no gutsinda mu matora akurikira Leta iyaretse agakomeza gukora mu gihugu.  N'andi mashyaka  nayo yatanze ibitekerezo  byayo nayo ashyigikiye ibyo twavugaga. Muri ibyo byose Leta ntacyo yavanyeho cyangwa yongeyeho, usibye gusa kwongereza  Perezida imyaka ku butegetsi. Mu mbanziriza-mushinga hari handitse ko Perezida amara imyaka itanu, mu nyandiko ya nyuma bashyiraho ko amara imyaka irindwi. Kubona mu bitekerezo byose byatanzwe, nta na kimwe Leta yigeze ishyiramo birerekana ubushake buke bwo kuzana demokarasi nyakuri mu gihugu.

Kurekura imfungwa za politiki

Perezida Pasteur Bizimungu na Minisitiri Charles Ntakirutinka na n'ubu baracyafunzwe kubera ko bahimbye ishyaka UBUYANJA. Ntibyumvikana rero igituma batari barekurwa ngo nabo bashobore kwamamaza  ishaya ryabo kandi noneho bimaze kwemerwa ko haba amashyaka menshi. Kuba bakiri mu munyururu kandi amatora yegereje,  biratwereka  ko ibyo Leta ivuga ntaho bihuriye n'ibikorwa.

Gusenya amashyaka mbere y'amatora

Mu nyandiko iheruka   http://www.newrwanda.org/Amatora_2003.htm, twavuze ku  iseswa ry'ishyaka MDR. Iri shyaka ryakoranye na FPR kuva igihe ifatiye ubutegetsi. Na n'ubu Minisitiri w'Intebe akaba akiva muri iryo shyaka.  Ntabwo bisobanutse rero ngo nyuma y'imyaka icyenda Leta ya Perezida Kagame abe ariho imenya ko rifite imigambi y'amacakubiri.  Nyamara mu nyandiko y'ishyaka AMAHORO http://www.newrwanda.org/letter_to_ictr.htm, twatangaje amazina  y'abategetsi bari muri Leta ya  Perezida Kagame abanyarwanda  n'abanyamahanga baziho kuba baragize uruhare runini mu itsembabwoko ry'abatutsi muri 1994. Abo bategetsi baracyafite imyanya yabo ikomeye mu butegetsi. Ishyaka AMAHORO ribona Leta yarashenye MDR kugirango idashobore kwiyamamaza  naho ubundi yari gutangirira kuri abo bategetsi bavugwaho  amarorerwa.

Itariki ya 25 z'ukwa 8, 2003 ni vuba cyane

Amatora ya Perezida, leta yategetse ko azaba ku itariki 25 z'ukwa munani, 2003.  Nta gihe gihagije cyo kugirango amashyaka yiyandikishe, kandi anamamaze abakandida bayo.  Biragaragara ko iyi hutihuti igamije gufasha Perezida Kagame kurwanya undi wese wakwiyamaza.  Abari biyemeje guhangana na Perezida Kagame muri aya matora, basabye ko yasubikwa kugirango babone umwanya wo kwiyamamaza, ariko leta yaranze.  Ishyaka AMAHORO ntabwo rizajya mu matora atazagira icyo ahindura ku byo Leta ya Perezida Kagame yateganije.

Ikinamico

Amatora ateganijwe ntabwo azaba ari amatora nyayo, azaba ari ikinamico.  Birababaje kubona Leta ya Perezida Kagame izapfusha amafaranga atagira ingano mu matora izi neza ko adafutuye.  Hari n'akandi kazi kazahagarikwa kubera ayo matora. Abakecuru, abasaza, n'indembe bazaza kunama kuri iryo zuba, kwica n'inyota n'inzara  kandi mu by'ukuri ntakizahinduka ku byerekeye uko byateganijwe. Ibi ni ugutuma  abaturage  bavunikira ubusa. Leta iretse hakaba amatora nyakuri, amashyaka n'abakandika babo bagapiganwa, byagirira igihugu cyose akamaro ndetse na Leta iri ku butegetsi muri iki gihe.  Mu matora nyakuri, ntawe utsindwa , abantu bose barahungukira.  Guhatira abaturage ibyo badashaka ni ukubakira ku musenyi.   

Kwiyandikisha

Ishyaka AMAHORO niribona hari ibimenyetso byerekana ko Leta yahagaritse amananiza yo kureka umunyarwanda  akishyira akizana mu kwitoranyiriza  ishyaka rimunyuze rinamunogeye, kandi ikareka amashyaka gukora ku mugaragaro, umutekano w'abayoboke baryo ntuhungabanywe  cyangwa ngo batotezwe   rizaherako ryiyandikisha mu gihugu. Ubuyobozi burasaba abanyarwanda  bashyigikiye ishyaka AMAHORO kwihangana kubera ko inzira ikiri ndende kuko rishaka kubakira igihugu ku nkingi zitajegajega. Ikitubujije kujya muri aya matora si ikindi. Ni ukubera ko tudashyigikiye ikinamico.  Niba Perezida Kagame ashaka ko haba amatora nyakuri yari akwiye gufungura imfungwa za politiki, kwemera imishyikirano ihuza amashyaka yose ikumvikana itariki amatora azaberaho, n'uburyo yakorerwamo.

Ishyaka AMAHORO rirasaba abanyarwanda gukomeza urugamba rwo kwungurana ibitekerezo byo  gukura u Rwanda mu ngoyi z'imitegekere mibi, rukazana demokarasi nyayo mu gihugu cyacu.  Urugamba ruracyari rurerure ariko umuti uzabaneka.

Alexandre Kimenyi

Perezida

AMAHORO People's Congres